अंगिका पावस गीत
(मुख्य पेज पर जायें- bejodindia.blogspot.com / हर 12 घंटे पर देखते रहें - FB+ Watch Bejod India)
बाजै छै ऐंगना में
पावस के गीत
सखी जागै छै प्रीत ।
बुन्नी के टिकुली हम्में
लेबै बनाय
पावस के फुन्सी लेबै
मांग में सजाय
ओलती में भींगी लेबै
पिया दिल जीत
बाजै छै ऐंगना में
पावस के गीत ।
चमकै बिजुरिया तें
मोन हहराय
बदरा के दै छै
हकारो सुनाय
ऐंगना मे छप -छप
छिरयावै छै प्रीत
बाजै छै ऐंगना में
पावस के गीत ।
झरिया के झोर ओढी
ऐंगना ठारी
पावस के मद में गेल्हों
सबकुछ हारी
बुन्दिया के कण-कण में
छैयलो हमर मीत
बाजै छै ऐंगना में
पावस के गीत ।
....
कवि - भावानंद सिंह प्रशांत
कवि का ईमेल आईडी - bhawanandsingh61162@gmail.com
No comments:
Post a Comment